مولد QR Code
حوّل أي رابط أو نص لرمز QR ونزّله كصورة، بدون رفع أي…
جرّبها ←الصق أي رابط مشكوك فيه وبنقلّك إذا هو احتيال أو فيه فيروسات، ولوين بيوديك فعلياً، وعمر الموقع.
وصلك رابط غريب بالواتساب أو بإيميل أو بإعلان؟ الصقه هون قبل ما تفتحه، وبنقلّك إذا عليه بلاغات احتيال أو فيروسات، ولوين بيوديك فعلياً، وعمر الموقع.
ما تفتح الرابط قبل ما تفحصه. فيك تلصق الرسالة كاملة، ومنطلّع الرابط منها لحالنا.
فاحص الروابط بيساعدك تعرف إذا الرابط اللي وصلك آمن قبل ما تفتحه. بنفحصه بقاعدة جوجل للمواقع الخطيرة (نفس اللي بتطلّع التحذير الأحمر بكروم)، وبنلحق تحويلاته لنقلّك لوين بيوديك فعلياً حتى لو كان رابط مختصر، وبنشوف عمر الموقع، وبننبّهك على حيل الاحتيال المعروفة بشكل الرابط، متل اسم ماركة مدسوس أو حروف مزوّرة.
بعكس أغلب أدواتنا، هالأداة ما بتشتغل بمتصفحك بس: الرابط بيوصل لسيرفرنا، وبيتبعت لجوجل ليتفحص، وسيرفرنا بيفتحه ليعرف لوين بيحوّل، ومنسأل سجلّات الدومينات عن عمر الموقع. ما بيوصل أي شي من جهازك أو حساباتك، وما منربط الرابط بهويتك، ومنحتفظ بنتيجة الفحص 30 دقيقة بس حتى إذا فحص حدا نفس الرابط ما نعيد الطلب. لا تلصق روابط فيها معلومات شخصية متل كلمات سر أو روابط استعادة حساب.
لا. الأخضر يعني الرابط مو مسجّل عند جوجل كموقع خطير، وما لقينا علامات مشبوهة بشكله. بس روابط الاحتيال الجديدة ممكن تكون عمرها ساعات ولسا ما انسجّلت. إذا الرسالة بتستعجلك، أو بتعدك بجائزة، أو بتطلب كلمة سر أو رقم بطاقة أو كود تحقق، تعامل معها كاحتيال حتى لو النتيجة خضرا.
اقرا اسم الموقع من الآخر لقبل أول «/»: الموقع الحقيقي هو آخر جزئين (أو تلاتة بدومينات متل example.com.sa)، وكل شي قبلهم ممكن يكون مزوّر. متلاً بالرابط facebook.com.login-check.xyz الموقع الحقيقي هو login-check.xyz مو فيسبوك. نحنا بنلوّنلك ياه بالبرتقالي بالنتيجة.
الروابط المختصرة (متل bit.ly) بتخبّي الوجهة الحقيقية، فما بتعرف لوين رايح قبل ما تكبس. الأداة بتلحق التحويلات وبتوريك الوجهة الأخيرة بدون ما تفتحها إنت.
أغلب مواقع الاحتيال بتنعمل وبتنحذف خلال أيام أو أسابيع، قبل ما تنكشف. فإذا موقع بيقول إنه بنك أو شركة توصيل كبيرة وعمره أيام، فهي إشارة قوية إنه مزيف. وفي دول كتير ما بتنشر تاريخ تسجيل مواقعها، فممكن يطلع «غير متاح».
إذا ما كتبت شي، سكّر الصفحة وامسح أي ملف نزل. وإذا دخلت كلمة سر، غيّرها فوراً من التطبيق الرسمي وفعّل التحقق بخطوتين. وإذا دخلت بيانات بطاقة، اتصل بالبنك ليوقفها. وإذا بعتلك الرابط صديق، نبّهه، لأن غالباً حسابه انسرق.
إذا فاتح الموقع من جوّا واتساب أو إنستغرام، افتحه أول بمتصفح Safari.